తెలంగాణ రాష్ట్రం జూన్ 2 2014 న అవతరించింది. బంగారు తెలంగాణగా తీర్చి దిద్దుకునే క్రమంలో నీటి పారుదల మరియు ఆయకట్టు అభివృద్ధి శాఖ లభ్యమవుతున్న నీటి వనరులను ఉపయోగించుకొని వ్యవసాయ రంగం , పారిశ్రామిక రంగం పటిష్టం చేసుకుంటూ, తాగునీటిని సమకూర్చడానికి కృషి చేస్తుంది. దీనికి గాను మన లక్ష్యాన్ని సాధించడానికి వివిధ సాగునీటి ప్రాజెక్టులను అమలు చేయడంలో ఈ శాఖ ముఖ్య భూమిక పోషిస్తుంది.

తెలంగాణ ప్రాంతంలో సాగునీటి అభివృద్ధి గోదావరి, కృష్ణనదులు, వాటి ఉపనదులు , చెరువులు, సరస్సులపై ప్రధానంగా ఆధారపడుతున్నది. తెలంగాణ ప్రాంతంలో చెరువులు అత్యంత ప్రాధాన్యత వనరులుగా ఉన్నాయి. భారీ చెరువుల నుండి చిన్న కుంటలు, ఇంకుడు చెరువులు అన్ని కలుపుకొని 46,531 నీటి వనరులు ఉన్నాయి. ఈ చెరువులను పునరుద్ధరించి, పునర్జీవింప చేయడానికి మిషన్ కాకతీయ కార్యక్రమం చేప్పటింది. రాష్ట్ర సర్వతోభిమూఖాభివృధికి రెండు నదుల నీటిని వినియోగించుకోడానికి రాష్ట్ర ప్రభుత్వం అనేక చర్యలు చేపట్టింది. ఈ లక్ష్యాన్ని సాధించడానికి గోదావరి మరియు కృష్ణ నదులలో ఆధారపడదగ్గ, మిగులు వరద నీటిని సంపూర్ణంగా వినియోగించాలని ప్రభుత్వం ప్రణాలికను రూపొందిస్తుంది.